Unha lavadora que perde auga, unha porta que non podemos abrir, un frigorífico que non funciona…, ás veces atopámonos con estas situacións que debemos resolver con urxencia e que acontecen nun día festivo, fora do horario laboral, ou concorrendo calquera outra circunstancia especial.
Nestes casos, podemos acudir a empresas de reparación urxente e con atención as 24 horas do día. Sen embargo, unha vez prestado o servizo, con frecuencia dámonos conta de que o prezo abonado parécenos moi elevado, ou non quedamos satisfeitos co resultado do servizo prestado.
Reparacións urxentes a domicilio antes de chamar…
Cando teña unha avaría na casa, o primeiro que ten que saber é se o seguro que ten contratado a cubre ou non. Revise detidamente as condicións da póliza, xa que se está cuberta, a reparación sairalle de balde.
Se o problema que ten é coa electricidade, teléfono, auga, gas…, póñase en contacto en primeiro lugar coa empresa subministradora, xa que coñecen á perfección as instalacións e en ocasións teñen servizos de asistencia gratuíta ou, de non ser así, probablemente
os prezos serán máis baixos.
En todo caso, se ten a avaría pola noite ou en día non laborable, antes de chamar a empresas de reparación urxente e con atención as 24 horas, debe valorar obxectivamente a súa urxencia, xa que estes servizos poden duplicar o prezo dos que se prestan en horario
ordinario.
Infórmese de con quen contrata: as contas claras…
Obteña toda a información que poida (nome da empresa, CIF, domicilio…), seralle moi útil se ten que reclamar; compare os prezos estimados que lle dan distintas empresas, os gastos de desprazamento…, e elixa a que mais lle conveña.
Esixa presuposto… por adiantado.
Cando chame por teléfono para contratar a prestación dun servizo deste tipo, é recomendable que solicite un presuposto previo estimativo. As empresas ou profesionais están obrigados a informarnos das tarifas de prezos vixentes, especialmente do desprazamento, man de obra, o que nos custará a elaboración dun presuposto previo e o recargo aplicable nos casos de servizos de urxencia e en horario nocturno. No momento en que o técnico visite a súa casa e á vista da avaría, esixa un presuposto por escrito. Calquera modificación ou encarecemento que se produza, deberalle ser comunicada por escrito para a súa aceptación. Así evitará sustos no momento de pagar. Debe saber que, no caso de non asinar o presuposto porque non o aceptamos, ao que si estaremos obrigados é ao pago da súa elaboración.
Cal é o contido que debe ter un presuposto?
• Datos do prestador do servizo (nome, domicilio, CIF/NIF).
• Desglose dos gastos de material, man de obra, desprazamento e IVA.
• Prezo total final, con todo incluído.
• Data da reparación e tempo que se prevé inverter na mesma.
• Período de garantía (de tres meses como mínimo).
• Sinatura do empresario/a e do consumidor/a.
Non esqueza pedir a factura
O técnico ten a obriga de entregarlle unha factura polo traballo realizado, e que deberá corresponderse co importe do presuposto previo ou con calquera modificación posterior do mesmo que estea aceptada por vostede. Asegúrese de que lle entrega unha factura numerada e detallada, e non un albarán ou recibo. Tamén é importante que saibamos que só nos poderán cobrar unha vez o desprazamento ao domicilio, polo que se o técnico acode sen as pezas ou ferramentas necesarias para levar a cabo a reparación, ese desprazamento engadido, non poderá incluílo no prezo da mesma.
Qué datos debe incluír a factura?
• Datos do prestador do servizo (nome, domicilio, CIF/NIF).
• Técnico prestador do servizo (nome e DNI).
• Data de finalización do traballo.
• Descrición do servizo prestado.
• Gastos de man de obra, desprazamento, materiais e IVA.
• Prezo total (impostos incluídos).
• Período de garantía (por lei son tres meses como mínimo).
• Sinatura do técnico e do consumidor/a.
Resolución de conflitos… cómo e onde reclamar
Se ten algún problema co servizo contratado, solicítelle ao técnico unha folla de reclamación; está obrigado a levalas e a entregarlla.
Cada folla de reclamación é un xogo unitario de follas autocalcables composto de 3 folios de diferentes cores (branco para a administración, verde para o reclamante e amarelo
para o reclamado). Na folla de reclamación debe indicar sempre os seus datos persoais, os datos do/a profesional ou empresa, os feitos acontecidos e de xeito moi claro o que se solicita.
No caso de querer solucionar o problema a través da vía arbitral, ten que solicitalo expresamente, podendo facelo no mesmo impreso.
Unha vez cuberta a folla de reclamación, xunte toda a documentación que posúa (presuposto, factura…), e preséntea ben directamente ou a través dunha Asociación de
consumidores, ante calquera servizo de consumo, xa sexa municipal, ou provincial, ou no rexistro de calquera administración e dirixida á administración de consumo
OMIC CULLEREDO 