As compañías eléctricas cargarán sobre o recibo da luz durante todo este ano o importe correspondente aos autos do Tribunal Supremo que obrigan a revisar a alza as peaxes eléctricas desde outubro do ano pasado.
Para iso, o Ministerio de Industria, Enerxía e Turismo publicou este xoves no BOE unha orde ministerial na que fixa o mecanismo para aplicar esta refacturación.
Podes descargalo premendo AQUI
Segundo indica a orde, o importe da revisión á alza desde outubro do ano pasado se prorrateará nos recibos de luz de 2012, de modo que os consumidores farán fronte de forma fraccionada a este pago.
Como xa indicou o Goberno, a aplicación dos autos do Supremo provocou a subida nun 7% da Tarifa de Último Recurso (TUR) en abril. Dito doutro xeito, o prorrateo ao que farán fronte os consumidores a partir de agora equivalerá ao 7% do prezo actual.
Para que os consumidores entendan a medida, a orde ministerial obriga ás eléctricas a remitir xunto ao próximo recibo unha carta explicativa e a desagregar durante os próximos meses na factura cada unha das partidas.
”As facturas emitidas polos comercializadores até o 31 de decembro 2012, recollerán de forma separada os conceptos correspondentes a cada período para o que corresponda realizar a refacturación”, afirma a norma publicada este xoves.
En concreto, as eléctricas especificarán o período ao que corresponde a refacturación, o consumo do devandito período e a contía correspondente á refacturación complementaria que se imputa en cada unha das facturas.
